Aarẹ agbarijọpọ awọn musulumi kan nipinlẹ Ọṣun ti wọn n jẹ Concerned Muslim Stakeholders and the League of Alfas, Sheikh Qozeem AbdurRahamon ti kilọ pe ki awọn Kristiẹni maṣe ri idakẹjẹ ati suuru awọn lori ọrọ oṣelu ipinlẹ Ọṣun bii ibẹru rara.
O ni iwa imọtaraẹni nikan ni ki awọn Kristiẹni kan tun maa pariwo kaakiri pe inu ẹsin awọn ni ẹni ti yoo di gomina ipinlẹ Ọṣun lọdun 2026 ti gbọdọ wa.
Nibi ipade oniroyin kan to waye niluu Oṣogbo ni Sheikh Qozeem ti sọ pe ti wọn ba n sọ nipa ẹsin ti ko tii rọwọ mu ninu eto oṣelu ipinlẹ Ọṣun, awọn ẹlẹsin Musulumi ni.
O ni ṣugbọn nitori pe awọn fẹ alaafia, awọn si fẹ iṣọkan laarin gbogbo ẹsin, lawọn ṣe dakẹ, ti awọn ko sọ nnkan kan, afigba ti awọn kan jade laipẹ yii ti wọn pe ara wọn ni ọdọ ẹgbẹ Christian Association of Nigeria, CAN, ti wọn si sọ pe wọn fọwọ ọla gba awọn Kristiẹni loju l'Ọṣun.
O ni iyalẹnu ni ọrọ naa jẹ nitori bii ẹni ti ko loye, to si mọ ọn mọ n fin awọn ẹlomiran niran ni ọrọ ti wọn sọ ọhun. O ni a ti ri igba ti gomina atigbakeji rẹ jẹ Kristiẹni, bẹe ni olori awọn oṣiṣẹ lọfiisi gomina igba naa ati olori awọn oṣiṣẹ ọba jẹ Kristiẹni, ti ko sẹni to pariwo.
O waa kilọ pe awọn ko nii laju silẹ ki ẹnikẹni fi ọrọ oṣelu da iyapa silẹ l'Ọṣun, tabi ki ẹnikẹni ro pe oun le yan ẹnikeji jẹ.
Bakan naa ni akọwe apapọ wọn, Mallam Abdulganiy Sahid Ọlaide, sọ pe ipinlẹ Ọṣun ki i ṣe fun ẹlẹsin kan, gbogbo awọn aṣaaju ẹgbẹ oṣelu si gbọdọ mọ pe irẹjẹ lo n fọ ẹgbẹ.
O ni Musulumi tootọ, ti ki i ṣe alafẹnujẹ, lo ku lati ṣe gomina ipinlẹ Ọṣun lọdun 2026.
No comments:
Post a Comment