Ẹgbẹ kan, Yoruba Socio-Cultural Pathfinder (YSP) ti ke si ọga ọlọpaa patapata lorileede yii, Kayọde Ẹgbẹtokun, lati ṣewadii lori ẹnikan ti wọn lo n pe ara rẹ ni ori-ade ninu ilu Mọdakẹkẹ nipinlẹ Ọṣun.
Ninu atẹjade kan ti aarẹ wọn, Bashọrun Ige Ogunjọbi, fi sita lo tun ti ke si awọn ori-ade kaakiri ilẹ Yoruba lati maṣe wo ọrọ naa niran ko to di pe yoo di iti ọgẹdẹ ti apa ko le ka mọ.
Ẹgbẹ naa fẹsun kan Adeyinka Adeshina Ọbawale, ẹni ti wọn lo n pe ara rẹ ni Oluọjẹ ti Ọjẹnpetu lori ilẹ Mọdakẹkẹ, pe o fẹẹ da wahala ati aibalẹ aya silẹ lagbegbe ti alaafia ti n jọba fun ọpọ ọdun sẹyin.
Ogunjọbi sọ siwaju pe bawo ni ẹni to wa lati ipinlẹ Kogi, to si maa n sọ pe ọmọ ilu Ipetumodu nijọba ibilẹ Ariwa Ifẹ loun, yoo ṣe waa sọ ara rẹ di ọba ninu ilu Mọdakẹkẹ?
O ke si awọn ọlọpaa lati beere lọwọ Ọbawale pe nigba wo lo jẹ Ọjẹnpetu, nibo ni wọn ti fi jẹ ẹ ati pe taa lo gbe ade le e lori debii pe o pinnu lati tun maa pe ara rẹ ni ọba ninu ilu to ni ọba alade.
O sọ siwaju pe ki lo de ti Ọbawale ko lọ siluu Ipetumodu lati maa figa-gbaga pẹlu ọba ilu abinibi rẹ, to fi waa jẹ pe ilu to ti tuba-tusẹ lo n gbero lati da ru.
YSP tun kilọ fun Ọbawale lati dẹkun sisọ ọrọ alufansa si Ogunṣua ilu Mọdakẹkẹ, Ọba Joseph Toriọla, wọn si ran an leti pe ẹni ti wọn ba torii rẹ fọ agbọn ki i duro jẹ nibẹ, nitori naa ko maṣe faaye gba ẹnikẹni lati lo o lati da wahala silẹ niluu Mọdakẹkẹ.
Ṣugbọn nigba to n ba awọn oniroyin sọrọ, Ọjẹnpetu sọ pe irọ patapata ni wọn pa mọ oun. O ni ko sigba kankan ti oun da wahala silẹ niluu Mọdakẹkẹ, dipo bẹẹ, awọn ọmọ ilu naa ni wọn n gbogun ti oun.
O ṣalaye pe, koda, lọjọ kẹta oṣu karun ọdun yii, ṣe lawọn janduku ya bo ile oun tibọntibọn, ti wọn si ba dukia oun jẹ, to si jẹ pe awọn ọlọpaa ni wọn doola ẹmi oun. O ni kọmiṣanna ọlọpaa ti pe wọn lori ọrọ naa, ṣugbọn wọn ko yọju.
No comments:
Post a Comment