Nimurasilẹ fun idibo gomina ipinlẹ Ọṣun, ẹgbẹ oṣelu New Nigeria Peoples Party, NNPP, ti kede pe ọjọ kẹta oṣu Kejila ọdun yii lawọn yoo ṣeto idibo abẹle.
Nibi eto yii ni wọn yoo ti mu oludije ti yoo gbe asia ẹgbẹ naa lọjọ kẹjọ oṣu Kẹjọ ọdun 2026.
Ninu atẹjade kan ti alaga wọn nipinlẹ Ọṣun, Dokita Tosin Ọdẹyẹmi, fi sita lo ti ṣalaye pe gbogbo eto lo ti to fun aṣeyọri idibo piramari ọhun.
Ọdẹyẹmi, ẹni to sọ pe lọwọlọwọ bayii, oloṣelu nla mérin ni wọn ti fi erongba han lati dupo gomina labẹ ẹgbẹ oṣelu NNPP, ẹnikan to si ti du ipo gomina ipinlẹ Ọṣun ri wa lara wọn.
O ni idunnu nla lo jẹ fun oun lati kede pe idibo asiko yii yatọ pupọ nitori kẹtikẹti lawọn ọmọ ẹgbẹ oṣelu PDP ati APC n darapọ mọ awọn.
O ni anfaani nla ni aibalẹ aya to n fi ẹgbẹ oṣelu PDP lorileede yii logbologbo bayii jẹ fun ẹgbẹ NNPP, bẹẹ ni iyapa to ti n ṣẹlẹ lọwọ bayii ninu ẹgbẹ APC l'Ọṣun fun awọn loore-ọfẹ lati gba awọn ọmọ ẹgbẹ naa.
Ọdẹyẹmi ke si awọn ọmọ ẹgbẹ lati tubọ tẹra mọ biba awọn eeyan Ọṣun sọrọ lori erongba rere ti ẹgbẹ naa ni fun wọn.
No comments:
Post a Comment