Akọwe apapọ fun ẹgbẹ oṣelu African Democratic Congress lorileede yii, Ọgbẹni Rauf Arẹgbẹṣọla, ti sọ pe oṣelu nikan ni iṣejọba Aarẹ Bọla Ahned Tinubu to wa lode bayii mojuto, wọn kuna patapata ninu iṣejọba.
Lasiko to ṣabẹwo ifikunlukun pẹlu awọn eeyan ẹkun idibo Ila/Ifẹdayọ/Boluwaduro ni Arẹgbẹṣọla, ẹni to jẹ Minisuta tẹlẹ fun Ọrọ Abẹle, sọrọ yii.
O ni iṣejọba to ba ti kuna lori eto aabp, okoowo ati ẹkọ, iṣejọba aṣetaani ni, Ọlọrun ko lọwọ si i.
''Nnkan mẹta la fi n mọ ijọba ti Ọlọrun ba lọwọ si, nnkan akọkọ ni pe o maa ri ọrọ eto aabo ṣe. Ko sẹni to le sun takaaka bayii, ẹni to ba sun, oju kan rẹ a la silẹ ni. Lati rin laarin ilu kan si ikeji di wahala.
''Ekeji, ijọba t'Ọlọrun ba lowo si, a ri oro eto ọrọ aje ṣe, ọdun marun sẹyin, teeyan ba ni ẹgbẹrun lọna ogun naira, a maa ṣakọ pe oun lowo lọwọ, nigba ti wọn ti debẹ yii, 20k o too ra oja mọ, ọrọ aje ti dorikodo, aye ti polukumusu mọ wọn lori.
''Ẹkẹta, ẹni t'Ọlọrun ba duro ti lati ṣejọba a ri ọrọ eto-ẹkọ ṣe, tori eto ẹkọ to ba munadoko la fi maa n juwe ọla, gbogbo rẹ lo di rudurudu mọ wọn lọwọ, wọn o dẹ ri i ro, tara wọn nikan ni wọn n gbọ.
''A n sọ fun wọn pe nnkan to n jẹ ijọba ni titu awọn eeyan lara, ijoba to ba wa nibẹ ti ko si ifọkanbalẹ, ijọba Ọlọrun kọ ni, ijọba aṣetani ni. Ijọbakijọba ti ko le fi ọkan awọn eeyan balẹ lori iṣẹmi ki i ṣe ijọba gidi.''
Arẹgbẹṣọla ṣeleri pe ẹgbẹ ADC yoo mu iṣejọba to duroore ba orileede Naijiria.
No comments:
Post a Comment