Gomina ipinlẹ Ọṣun, Sẹnetọ Ademọla Adeleke, ti parọwa si gbogbo awọn ọmọ ẹgbẹ oṣelu Peoples Democratic Party (PDP) niha Guusu Iwọ-Oorun orileede yii lati ṣiṣẹ papọ ni iṣọkan, ki wọn si bẹrẹ gbogbo igbesẹ ti yoo mu ki imọlẹ ẹgbẹ naa tubọ maa tan si i.
Lasiko ti wọn n ṣi sẹkiteriati ẹgbẹ naa to wa niluu Ibadan, eleyii ti wọn fi ṣọrii alaga ẹgbẹ PDP tẹlẹ niha Guusu Iwọ-Oorun to doloogbe, Ọnarebu Sọji Adagunodo, ni Adeleke ṣalaye pe asiko ti to ki ija dopin ninu ẹgbẹ naa, ki iṣọkan si fẹsẹ mulẹ.
Gẹgẹ bo ṣe wi, ayẹyẹ naa ṣe pataki nitori o jẹ anfaani lati ke si gbogbo ọmọ ẹgbẹ lati gbagbe ikunsinu to ti wa nilẹ tẹlẹ, ki ifẹ wa laarin ara wọn nile ati loke-okun.
O ni o san ki awọn maa ba ara awọn ja ninu ile ijọba ju ki awọn di ẹgbẹ alatako lọ. Ti ifẹ ba ti wa, Adeleke sọ siwaju pe ẹgbẹ naa yoo lanfaani lati gba awọn ipinlẹ to pọ sii kaakiri orileede Naijiria lasiko idibo.
O ni oun kan ṣoṣo ti wọn fi le ranti Adagunodo titi lae ni ki isọkan gbooro sii ninu ẹgbẹ naa, o si gbadura pe ki Ọlọrun tẹ oloogbe naa si afẹfẹ rere.
Ninu ọrọ tirẹ, Gomina ipinlẹ Ọyọ, Ẹnjinia Ṣeyi Makinde kin ọrọ Adeleke lẹyin, o ni bi gbogbo awọn ti inu n bi lọna kan tabi omi-in ṣe peju sibi ayẹyẹ naa jẹ apẹẹrẹ pe ẹgbẹ naa ti wa niṣọkan ni ẹkun yii.
Makinde rọ gbogbo awọn adari atawọn ọmọ ẹgbẹ naa lati gbagbe ọrọ ana, ki wọn si ṣiṣẹ papọ fun aṣeyọri ẹgbẹ PDP ninu gbogbo idibo to n bọ.
No comments:
Post a Comment