Aṣaaju ẹgbẹ oṣelu African Democratic Congress nipinlẹ Ọṣun, Sẹnetọ Kọla Ogunwale, ti sọ pe gbayau ni ilẹkun ẹgbẹ naa ṣi silẹ fun oludije to ba mọ pe oun kajuẹ lati gbe asia ẹgbẹ naa ninu idibo gomina to n bọ lọna nipinlẹ Ọṣun.
Tẹ o ba gbagbe, laipẹ yii ni igun kan ninu ẹgbẹ ọhun, iyẹn Ọmọluabi Progressives, gbe atẹjade kan sita pe Iwọ-oorun ipinlẹ Ọṣun lawọn yoo ti mu oludije funpo gomina.
Ṣugbọn Ogunwale, ẹni ti gbogbo eeyan mọ si Jumokol ṣalaye pe ọrọ awọn igun kan ninu ẹgbẹ niyẹn, ki i ṣe ọrọ ẹgbẹ ADC l'Ọṣun.
O ni ohun ti ẹgbẹ fẹ ni oludije ti yoo ṣetẹwọgba fun gbogbo araalu, ti yoo si mu ki ẹgbẹ naa rọwọ mu ninu idibo ọjọ kẹjọ oṣu Kẹjọ ọdun 2026.
Ogunwale ṣalaye fun _Gbagedeọrọ_ pe oludije awọn le wa lati Iwọ-oorun, Ila-oorun tabi Aaringbungbun Ọṣun, afojusun kan ṣoṣo tawọn ni ni lati gbajọba lọwọ ẹgbẹ PDP to wa nibẹ bayii.
O sọ siwaju pe awọn igun ti wọn gbe atẹjade ọhun sita ko tii bẹrẹ si i gba kaadi ọmọ-ẹgbẹ ADC di bi a ti n sọrọ yii.
'Wọn ko tii bẹrẹ si i gba kaadi ọmọ ẹgbẹ lọdọ wa, wọn si n sọ pe awọn jẹ ọmọ ẹgbẹ ADC. Awa o ba wọn ja, ko sija, ko si ẹgbẹ oṣelu ti ifẹ-ọkan onikaluku ki i tii da ija silẹ, ija oṣelu ni, ko si ikunsinu kankan laarin ara wa. Boya nnkan kan wa wa ti wọn gbe lọwọ ti awa ko mọ, to si le yatọ si nnkan tawọn gbe dani, a ko mọ. Awa faaye gba gbogbo oludije ni o. Gomina le wa lati Iwọ-oorun, Ila-Oorun tabi Aaringbungbun Ọṣun. Boya eyi ti wọn fẹẹ yan lati Iwọ-oorun yẹn maa darapọ mọ ẹlomiran ti awa ba yan, wọn a wa jọ kopa ninu idibo piramari. Awa naa si le sọ pe Iwọ-oorun la ti ri ẹni ti ko nii ṣe aafusa.'
Ni ti ẹgbẹ ADC, Jumokol ṣalaye pe ojoojumọ ni ẹgbẹ naa n ran bii oorun kaakiri orileede Naijiria, laipẹ ni yoo si wa ni ipo kinni ninu akọsilẹ awọn ẹgbẹ oṣelu.
Lọwọlọwọ bayii, aṣofin agba tẹlẹ yii ṣalaye pe ipo keji ni ẹgbẹ ADC wa lorileede Naijiria lẹyin ẹgbẹ APC
No comments:
Post a Comment