Ileeṣẹ ọlọpaa ipinlẹ Ọṣun ti sọ pe iwadi ti bẹrẹ lori iku ọkunrin ọlọdẹ kan, Baṣiru Aminu Ojo, ti wọn ba oku rẹ nita gbangba laarọ ọjọ Tusidee to kọja.
Agbegbe Oke-Ọla niluu Igbaye nipinlẹ Ọṣun ni ibi ti Baṣiru ti n ṣiṣẹ ọdẹ oru, nibẹ naa lawọn to n kọja ti ba oku rẹ ni nnkan bii aago meje aarọ ọjọ naa.
Oniruuru nnkan lawọn eeyan n sọ nipa iku Baṣiru. Bi awọn kan ṣe n sọ pe boya ṣe ni wọn pa a sibẹ, lawọn kan n sọ pe o ṣe e ṣe ko jẹ pe aisan kan lo deede kọlu u lojiji, to si yọri si iku fun un.
Amọ ṣa, alukoro ileeṣẹ ọlọpaa l'Ọṣun, Abiọdun Ọjẹlabi, so pe nigba ti awọn eeyan agbegbe naa lọ fi iṣẹlẹ ọhun to ileeṣẹ ọlọpaa leti, ti wọn si lọ sibẹ, ko si oju-ọgbẹ tabi ami ijakadi kankan lara Baṣiru.
O ni awọn ti gbe oku rẹ lọ sile igbokupamọsi, iwadii si ti bẹrẹ lati mọ ohun to fa iku rẹ gan an.
No comments:
Post a Comment