Ọkan pataki lara awọn oludije funpo gomina ipinlẹ Ọṣun labẹ asia ẹgbẹ oṣelu All Progressives Congress, Dokita Peter Adebayọ Babalọla, ti sọ pe iṣejọba oun ko nii tojubọ eto iṣuna ijọba ibilẹ, wọn yoo lanfaani lati ṣiṣẹ idagbasoke fun awọn araalu.
Ninu atẹjade koko ẹlẹga marun-un to fi sita ni Babalọla, ẹni ti gbogbo eeyan mọ si Peter Action, ti sọ pe iriri oun gẹgẹ bii alaga nigba kan ri fun ajọ to n ri ọrọ iṣakoso ijọba ibilẹ l'Ọṣun ti jẹ ki oun mọ pe tijọba ba faaye gba ijọba ibilẹ lati ṣiṣẹ bo ti yẹ, idagbasoke yoo tete waye kaakiri ipinlẹ.
O ni ijọba ibilẹ lo sunmọ awọn eeyan igberiko ju lọ, ti wọn ba si wa lominira, yoo mu nnkan rọrun fun ẹni to ba jẹ gomina nitori ijọba ibilẹ lawọn araalu yoo kọkọ ko ẹjọ lọ ko too kan ijọba ipinlẹ.
Labẹ iṣejọba rẹ, Babalọla tun ṣẹleri lati da ajọ kan to pe ni Osun Action Youth Scheme silẹ, eleyii ti yoo fun awọn ọdọ lanfaani si iṣẹ ati oniruuru owo iranwọ lati wulo lawujọ.
O sọ siwaju pe gbogbo ipinlẹ Ọṣun patapata ni iṣẹ idasogbasoke yoo ti kari lai fi si ibikan ju ibomiran lọ, bẹẹ ni ayipada nla yoo ba awọn ileewe lati le jẹ ki awọn akẹkọọ Ọṣun ni ẹkọ to peye lati le figagbaga pẹlu awọn akẹkọọ kaakiri agbaye.
Dokita Babalọla fi kun ọrọ rẹ pe awọn ipinnu oun yii ki i ṣe ọrọ oṣelu rara, itara ti oun ni fun idagbasoke ipinlẹ Ọṣun ati erongba lati sọ ireti awọn araalu di ọtun lo fa a ti oun fi jade lati dije dunpo gomina.
No comments:
Post a Comment