Ile-ẹjọ giga ipinlẹ Ọyọ to fikalẹ si ilu Ibadan ti fi ọjọ kun idajọ rẹ eleyii to faaye gba ẹgbẹ oṣelu Peoples Democratic Party, PDP, lati ṣe ipade apapọ wọn lọjọ Satide ọsẹ yii lai si idiwọ kankan.
Agbẹjoro fun ajọ eleto idibo orileede yii (INEC), Amofin O. Adeyẹmi, lo ti kọkọ pe ile-ẹjọ naa nija lorii agbara to ni lati gbọ ẹjọ ti awọn olujẹjọ gbe siwaju rẹ.
O ni ileeṣẹ ijọba apapọ ni INEC nitori naa, ile-ẹjọ giga to jẹ tijọba apapọ nikan lo lagbara lati gbọ ẹjọ to ba nii ṣe pẹlu rẹ
O fi kun ọrọ rẹ pe ile-ẹjọ giga ijọba apapọ ti dajọ pe ẹgbẹ PDP ko gbọdọ tẹsiwaju ninu ipade apapọ naa, nitori naa, ile-ẹjọ giga ipinlẹ Ọyọ ko lagbara lati gbọ ẹjọ yii, o si beere pe ki adajọ yi i danu.
Ṣugbọn agbẹjọro olupẹjọ, Amofin Agba Musbau Adetumbi tako awijare agbẹjọro olujẹjọ, o ni nnkan to beere jẹ titẹ ẹtọ awọn olujẹjọ loju mọlẹ.
O ni ofin orileede yii ti ọdun 1999 fun gbogbo eeyan lanfaani lati korajọpọ ati lati ṣepade apapọ niwọn igba to ba ti ba ofin mu. O ni ajọ INEC ko si lara awọn ajọ to jẹ pe ile-ẹjọ giga ijọba apapọ nikan lo gbọdọ gbọ ẹjọ wọn.
Léyin to gbọ atotonu awọn agbéjọro abala mejeeji, Onidajọ Ladiran Akintọla sun idajọ rẹ siwaju di ọjọ kẹjọ osu Kejila ọdun yii. O ni aṣẹ ti oun ti pa tẹlẹ pe ki olujẹjọ maṣe da si ọrọ ipalẹmọ fun ipade apapọ naa ṣi wa bẹẹ.
No comments:
Post a Comment