Iranṣẹ Ọlọrun kan niluu Eko ti gbogbo eeyan mọ si Baba Confirm JP, ti sọ pe ko si ọgbọn ti ẹnikẹni le da si i, Sẹnetọ Ademọla Adeleke yoo ṣe gomina ipinlẹ Ọṣun ni saa keji.
Ninu ifọrọwanilẹnuwo kan ti Alore TV ṣe fun un lo ti sọ pe ọmọ majẹmu ni Adeleke, ẹni ti Ọlọrun yọnu si si ni pẹlu.
Gẹgẹ bo ṣe wi, ''Adeleke, ọmọ majẹmu ni, majẹmu si ti duro, ko si nnkan to le yi i pada. Mi o fẹẹ mọ ọgbọn ti Tinubu le ṣe, ẹ lọ kọ ọ silẹ, ti ko ba ti ṣẹ, ẹ jẹ ki wọn gbe mi, ki wọn lọ pa mi.
''Ni igba ti wọn ni Adeleke ko nii wọle gan an, Oluwa ni ki n jade pe Oluwa sọ pe o maa wọle. Lẹyin to tun wọle tan ti wọn n ba a fa a, awọn wolii kan jade pe o maa fidi rẹmi ni kootu, Oluwa tun sọ fun mi pe oun lo maa bori, o si bori.
''Ko sẹni to le ba a du u, Adeleke tun ni gomina to n bọ, mi o tii mọ ọgbọn ti wọn fẹẹ da, Oluwa lo sọ bẹẹ. Oun lo maa pada sibẹ, ko sohun to fẹẹ ṣẹlẹ.
''Nnkan to maa n ṣẹlẹ ninu aye ẹni to ba jẹ ọmọ majẹmu ni Adeleke maa n sabaa ṣe yẹn, ẹ ri i pe o maa n jo gan an. A yatọ siraa wa. Ọmọ majẹmu pọnnbele ni, oun naa si mọ majẹmu rẹ, majẹmu rẹ ni ijo to maa n jo yẹn, ere kọ lo n ṣe o.
''O yẹ ki Dafidi wa ninu orukọ rẹ tori majẹmu to wa lorii Dafidi lo wa lorii rẹ; o maa jo niwaju ọta, o si maa ṣẹgun ọta. Ko fi ọkan balẹ nipinlẹ Ọṣun.
''To ba ti kuro ninu ẹgbẹ to wa, orukọ rẹ ti bajẹ niyẹn, ko joko sibi to wa, o waa le ṣe ọdun kẹjọ tan ko sọ pe oun ko ṣe nnkan kan mọ, ṣugbọn ọdun mẹjọ rẹ maa pe, ko si gbọdọ kuro ninu ẹgbẹ to wa.
''Ki Ademọla Adeleke maṣe kọja majẹmu ti Oluwa fun un, ko si gbọdọ mikan, Baba Confirm JP l'Oluwa ran si i. Ẹni ti Ọlọrun yọnu si ni.''
No comments:
Post a Comment