Walahi, ko bi wa ninu, o ti di aṣa Adeoti lati binu kuro ninu ẹgbẹ ti ko ba ti ri nnkan to fẹ - Abọsẹde

Alukooro fun igun Ọmọluabi Progressives, to tun jẹ alakoso iroyin fun ẹgbẹ oṣelu ADC nipinlẹ Ọṣun, Oluwaṣeun Abọsẹde, ti sọ pe ko si nnkan ti Alhaji Moshood Adeoti le ṣe to le dun ẹnikẹni nitori o ni iwa fifi ẹgbẹ silẹ nigbakuugba ti nnkan ko ba ti lọ bo ṣe fẹ.

Alhaji Adeoti, akọwe ijọba ipinlẹ Ọṣun nigba kan ri, to tun jẹ igbakeji adari igun Ọmọluabi Progressives, lo kọwe lọjọ Sannde ọsẹ yii pe oun ko fẹ ni nnkan kan ṣe pẹlu awọn Ọmọluabi Progressives mọ.

Igbesẹ yii, gẹgẹ bi iwadi Gbagedeọrọ ṣe fi han, ko ṣẹyin bi igun naa ṣe kede abẹnugan ile igbimọ aṣofin Ọṣun nigba kan ri, Najeem Salam gẹgẹ bii ẹni ti wọn yoo ṣatilẹyin fun ninu idibo abẹle ẹgbẹ ADC.

A gbọ pe awọn lamẹẹtọ ẹgbẹ naa ni wọn dibo lọjọ Furaidee to kọja niluu Eko laarin Adeoti, Najeem ati Adelere Oriolowo, ti wọn si mu Najeem laarin awọn mẹtẹẹta.

Nigba to n sọrọ lori lẹta ifẹgbẹsilẹ ti Adeoti kọ, Abọsẹde ṣalaye pe ko ṣajeji si awọn bo ṣe lọ. O ni 'A gbagbọ pe ti ija ba wa ninu oṣelu, o yẹ ka yanju rẹ ni, ki i ṣe ọrọ imọtara ẹni nikan. Gbogbo ọna la maa n gba lati tẹ Alhaji Adeoti lọrun ṣaaju asiko yii.

'Nigba to jẹ alaga ẹgbẹ AC ati ACN, o gba ipo akọwe funjọba ipinlẹ Ọṣun. Nigba to di pe Ọgbẹni fẹ ki oludije funpo gomina wa lati Iwọ-oorun Ọṣun lọdun 2018, oun la tun mu, ko too di pe Aarẹ Bọla Tinubu sọ pe rara nigba naa.

'Adeoti fi wa silẹ nigba yẹn. Inu wa ko dun ṣugbọn a ko binu. Ni bayii to tun fi wa silẹ, inu wa ko dun, sibẹ a ko binu, a gbadura pe bo ṣe pada wa nigba yẹn, ko tun pada sọdọ wa.'